Ondorioz, zentral nuklearrari beste lau urtez luzatu dio ustiapen baimena. Sebastian Industria ministroak dio "konponbidea orekatua, arduratsua eta herrialdeari komeni" zaiona dela. Zapaterok aitortu du "alde batetik eta bestetik kritikak" jasoko dituela.

 

Santa Maria de Garoñako zentral nuklearrari (Burgos, Espainia) beste lau urteko bizitza geratzen zaio, Espainiako Gobernuak 2013ko apirilaren 1ean itxiko duelako, zentrala sortu zutenetik 42 urtera. Miguel Sebastian Industria ministroak erabakia gaur baieztatu du jendaurrean. Erabakia azaldu aurretik, zentraleko enpresa jabeei -Iberdrola eta Endesari- eta langileen ordezkariei eman die albistea Sebastianek.

Bihar amaituko zitzaion ustiapen baimena Garoñari, baina beste lau urtez segituko du, gobernuak erabakita. "Konponbidea orekatua, arduratsua eta herrialdeari komeni zaiona izango da", adierazi du Sebastianek goizean. Lanpostuei dagokienez erantzunkizunez hartutako erabakia dela gaineratu du Sebastianek. "Garoñako langile guztiek lanpostua izango dute zentrala itxi ostean".

Greenpeace ez dago ados zentral nuklearra 2013 arte irekita mantzentzeko erabakiarekin, eta beraz epaitegietara joko duela aurreratu du.

Jose Luis Rodriguez Zapatero Espainiako Gobernuko presidenteak gaur goizean esan du erabakia "arrazoizkoa" dela, baina aitortu du "alde batetik eta bestetik kritikak" jasoko dituela. Iazko hauteskunde kanpainan agindu zuen Garoña baliagarritasun aldia amaitutakoan itxiko zuela -2011n-. 40 urte bete dituzten ia zentral guztiak itxita daudela gogorarazi zuen -bakarra dago zabalik: Erresuma Batuan, eta aurki dira ixtekoak-.

Ekainaren hasieran Espainiako exekutiboarentzat egindako txostenean, CSN Espainiako Segurtasun Nuklearrerako Batzordeak zioen Garoña 2019ra arte lan egiteko moduan dagoela. Hala ere, haren iritzia ez da loteslea. Hainbat baldintza jarri zituen CSNk; besteak beste, 2019ra arte aritzeko, zentralean 50 milioi euro inbertitu beharko liratekeela segurtasunean.

Hainbat eta hainbat herritar, eragile eta erakunde zentrala ixtearen alde azaldu dira azken asteetan. Haien artean, Arabako Foru Aldundia -Arabatik oso gertu dago Garoña-. Eusko Legebiltzarrak ere hala eskatu du. Ez zentraleko bertako langileek. Horiek diote Garoñak, zuzenean edo zeharka, mila lanpostu inguru sortzen dituela.

Nuklearren Kontrako Koordinakundeak duela egun batzuk iragarri zuen gobernuak zentralaren ustiapen baimena luzatuz gero auzitara joko duela.

 

#BERRIA tik ateratako informazioa

Izena/Gaitzizena

e-posta

Web gunea

Titulua

Iruzkina

txikiago | haundiago

e-mail bidez jaso (erabiltzaileak bakarrik)

Irakurri eta onartu egin dut... Erabiltzeko baldintzak

Idatzi irudian agertzen diren letrak/zenbakiak

iruzkin berria